சுண்டைக்காய் புளிக் குழம்பு (1)

சுண்டைக்காய் புளிக் குழம்பு (1)
தேவையானவை:
சுண்டைக்காய் - 1/4 கிண்ணம்.
தேங்காய்த் துருவல் 1/4 கிண்ணம்.
பயற்றம் பருப்பு - 2 தேக்கரண்டி
மிளகாய்ப் பொடி - அரை தேக்கரண்டி
மல்லிப்பொடி - 1/4 தேக்கரண்டி
புளிக்கரைசல் - 1/4 கிண்ணம்.
நல்லெண்ணெய் - 1 தேக்கரண்டி
சின்ன வெங்காயம் நறுக்கியது - 1/4 கிண்ணம்.
உப்பு, கடுகு, கறிவேப்பிலை தேவையான அளவு.
செய்முறை: பச்சை சுண்டைக்காயை இரண்டாக நறுக்கி அரிசி கழுவிய தண்ணீரில் போட்டு நன்கு கழுவி எடுத்து, அத்துடன் பயற்றம் பருப்பையும் போட்டு 1 கிண்ணம் தண்ணீர் கலந்து குக்கரில் வேக வைத்துக் கொள்ளவும். தேங்காயை வறுத்து எடுத்து, மிளகாய்ப் பொடி, மல்லிப் பொடி கலந்து மிக்ஸியில் அரைத்துக் கொள்ளவும். வாணலியில் எண்ணெய்விட்டு கடுகு தாளித்து நறுக்கிய வெங்காயம் போட்டு வதக்கவும். வெங்காயம் நன்கு வதங்கியதும் வெந்த சுண்டைக்காய் கலவை, அரைத்த தேங்காய் கலவை, புளிக்கரைசல் இவற்றை விட்டு 1 கிண்ணம் தண்ணீர் சேர்த்துக் கிளறி 10 நிமிடம் கொதிக்கவிடவும். எண்ணெய் மிதக்க ஆரம்பித்ததும் உப்பு, கறிவேப்பிலையைப் போட்டு நன்கு கிளறி இறக்கிவிடவும்.
இக்குழம்பானது சுடுசோறு, இட்லி, ஆப்பம், தோசைக்கு, தொட்டுக் கொள்ள சுவையாக இருக்கும். மேலும் பச்சை சுண்டக்காய் மருத்துவ குணம் கொண்டதால் அனைவருக்கும் ஏற்றது.